بەپێی بەڵگەنامەیەكی فەرمی، قوتابیانی هەولێر لە کۆتاییی ١٩٥٣دا لە ڕێگەی بڵاوکراوەیەكەوە لە ساڵیادی خۆپیشاندانی تشرین و ناڕەزایی دەربڕین لە دژی حکوومەتی عێراق، دامودەزگە ئیداری و ئەمنییەکانی هەولێر و بەغدایان بەخۆیان سەرقاڵ کردووە و پۆلیسیش نەیتوانیوە هیچ بەڵگەیەک لەسەر قوتابیان، بدۆزێتەوە.
خۆپیشاندانی تشرین لە ٢٦ی ئابی ١٩٥٢ بەمانگرتنی کرێکارانی بەسڕە دەستی پێ کرد، دواتر لە ٢٦ی تشرینی یەکەم قوتابیانی عێراق درێژەیان پێ دا و داوای گۆڕینی سیستەمی حوکمڕانییان لە پاشایەتییەوە بۆ کۆماری دەکرد، بەڵام حکوومەتی عێراق توانی کۆتایی بەو خۆپیشاندانانە بهێنێت.
دواتر موتەسەڕیفی لیوای هەولێر لە ١٧/١١/١٩٥٣، بەنووسراوێک وەزارەتی ناوخۆی لە جموجۆڵی یەکێتیی قوتابیان لە هەولێر ئاگەدار کردووەتەوە.
لە ٢٤/١١/١٩٥٣شدا وەزیری ناوخۆی عێراق نووسراوەکەی ڕۆژی ١٧/١١ی موتەسەڕیفی لیوای هەولێری بۆ بەڕێوەبەرایەتیی گشتیی پۆلیس ناردووە تاوەکو ”لێکۆڵینەوە“ لە جموجۆڵی قوتابیانی هەولێر بکەن و ”ڕێکاری پێویست“ بگرنە بەر.
قوتابیانی هەولێر بڵاوکراوەیەکیان لە ١/١٢/١٩٥٣ لە نێوان قوتابیان بڵاو کردووەتەوە و تێیدا ئاماژەیان بەیادکردنەوەی ڕاپەڕینی تشرین لە دژی ”دیکتاتۆریەتی پۆلیس و خاین و داگیرکاران“، کردووە.
هەر هەمان ڕۆژ، بڵاوکراوەکەی قوتابیان بە پۆلیس گەیشتووە و بەڕێوەبەری پۆلیسی لیوای هەولێریش نووسراوێکی بۆ موتەسەڕیفی لیوای هەولێر ناردووە و تێیدا ئاماژەی بەوە کردووە، دەستیان بەسەر بڵاوکراوەیەکدا گرتووە، کە بەناونیشانی (ساڵیادی ڕاپەڕینی تشرینی نەمر) لە نێوان قوتابیان بڵاو کراوەتەوە، ”بۆ ئاگەداریتان“.
دوای ١٢ ڕۆژ لێکۆڵینەوە و هەوڵدان بۆ دۆزینەوەی بەڵگە لەسەر قوتابییە ناڕازییەکان، بەڕێوەبەری پۆلیسی لیوای هەولێر نووسراوێکی ئاراستەی بەڕێوەبەری گشتیی پۆلیس کردووە و تێیدا دەستەوەستانیی خۆیان لە دۆزینەوەی بەڵگە و سزادانی قوتابییەکان، ڕاگەیاندووە.
