بۆ قەرەنی جەمیل، ئەو هونەرمەندەی تابلۆی گەڕانەوەی کێشا
ئەو کاتانەی تارماییی سەدام بەدواوەمان بوو
ڕێگە نەدەدرا ڕەنگ لەسەر کانڤاس ئازاد بێت
وەک سێبەرەکی ڕەساسیی سەر یادەوەرییەکان ڕۆیشتیت
لەبەر ئەوە نا حەزت لێیە بڕۆیت
لەبەرئەوەی تەنیا بێدەنگی یان تەسلیمبوون مابوون
لەگەڵ ئەوەش تاراوگە هەر تاراوگە نەبوو
ئەو شوێنەت هەڵبژارد کە لێی ون دەبیت
ئیتاڵیا بۆ خەونە بەستووەکانی سەدەیەک لە پەیکەرتاشیی
مایکڵ ئەنجڵۆ
ئیسپانیا لەبەر هاواری جێرنیکا
لە مەدرید گۆڕەکان لێت نزیک دەبوونەوە
بەبێدەنگی مردووەکانیان پێ دەناساندی
ناوی تۆیان بە چرپە دەگوت
لەناو تۆزی گەلەرییە لەبیرکراوەکان
سێبەری پیکاسۆ لەناو تابلۆکان دەهات و دەچوو
سەعاتەکانی دالی دەتوانەوە
کات و ڕەنگ لەگەڵیان دەچەمانەوە
کارافاگیۆ بە نهێنی لە کەنیسە،
ئەو تابلۆیانەی لە ڕووناكی و سێبەر کردبوونی
دەیخستییە قووڵاییی گیان و
دەیگوت دەتوانم جارێکی تر جوانیم خۆش بوێت
تاراوگە گوتی دەمێنیتەوە؟
بەڵام تۆ ڕەگت لە شوێنەکی ترە
لەوێندەر شین دەبییەوە
چەندەها ساڵ
فڵچەت بەهەناسەی دووری دەلەرزێ
“ببوورە دەبێت بڕۆمەوە» ئەوە وەڵامی تۆیە
سەرما و هەندێک لە ماڵەکەت جێ هێشت
بۆ ئەوەی گەشتە یەکسەرییەکەت لێرە بکەیت، گەڕایتەوە
ئێستە پزیشکەکان باسی دوا قۆناغی نەخۆشییەکەت دەکەن
وەک ئەوەی ژیانت لەگەڵ چارتەکەت دابخەن
قەرەنی
تۆ نامریت
تۆ لەناو سێبەری بێدەنگیی هێڵە زیوینییەکانی، پشوو دەدەیت
ڕەنگی خەونیت
ئەو فڵچەیەیت کە نەخۆشی ناتوانێت دەستی لێ بدات
ماتەمینی ئەنفالی
هەمیشە تازەی بازاڕی کۆنی تەیراوەی
ئەو کۆلارە قاقەزانەی بەپێکەنینی منداڵان دەچنە ئاسمانی قەڵا
تابلۆکانت هەڵسانەوە
ڕەنگیان پێش خۆیان دا
وەک ئەوەی بیانەوێت دوا قسەی دڵیان بکەن
جەستەت ماندوو، دەستەکانت بێ جووڵەن، بەڵام
جەوهەرت فۆڕمەکی نوێی تابلۆکانتە
هەندێک چیڕۆک بە مەرەکەب دەنووسرێنەوە
هەندێک بە فڵچە
خەم فێرت دەکات چۆن یادەوەری بکەیتە ڕەنگ
ئەگەر با خۆڵی جووڵاند
پێی بڵێ ژێر خاک کەوتن نامترسێنێت
من بە مەبەست دێمەوە
تا دەگەڕێیتەوە، ڕەنگەکان چاوەڕوانن
بێدەنگی ترس نییە لە ڕۆیشتن
ئەوە دوایین لێدانی فڵچەیە لە تابلۆی بەرەو ماڵەوە
